Eulogy for Mayor Reynaldo Uy

By Rep. TEDDY CASIÑO, Bayan Muna
May 20, 2011

Sa ngalan ng Bayan Muna at ng iba pang party list sa ilalim ng Makabayan Coalition - ang Gabriela Women's Party, Anakpawis, Act Teachers at Kabataan Partylist - pati na rin ang kanyang mga dating kasamahan sa Kongreso, nais kong iparating ang aming taus-pusong pakikiramay sa kabiyak ni Mayor Rey na si Jojie, mga anak na sina Aika, Jimjim, Joey at Jeca, kanyang mga kamag-anak at kaibigan, at buong mamamayan ng Calbayog at Western Samar. Hindi kayo nag-iisa.

Kasama n'yo kami at ang sambayanang Pilipino sa pagluluksa at paghangad ng hustisya para sa ating iginagalang at pinakamamahal na mayor at dating kasama ko sa Kongreso.

Bigyan natin ng pinakamataas na pagpugay si Mayor Ining - doktor ng bayan, lider ng progresibong kilusan, three-term congressman ng unang distrito ng Western Samar, Mayor ng Calbayog, at ngayo'y martir ng sambayanang Pilipino. (Palakpakan po natin si Mayor Uy.) Mabuhay ka, Mayor Reynaldo S. Uy! Ang alaala mo'y nakakintal sa aming mga puso.

Si Rey ay nakasama ko sa Kongreso mula 2004 hanggang 2010. Ako noon ay nasa Minority at siya naman ay nasa Majority. Kahit na siya'y nasa kampo ng administrasyon, madalas niya akong sulsulan na magsalita laban sa mga katiwalian at pang-aabuso ng gobyerno ni dating pangulong Arroyo. Ipinaubaya na niya sa amin ang laban sa mga usaping national dahil mas malaki ang labang hinaharap niya sa sarili niyang lugar dito sa Samar. Sa puso't prinsipyo, isa siyang tunay na aktibista - may puso't damdamin para sa masa at sa bayan.

Nasaksihan namin ito sa kanyang consistent na paglantad at paglaban sa extrajudicial killings, mga pagdukot at sapilitang pagkawala, at iba pang human rights violations na kinasasangkutan pangunahin ng mga militar at pulis. At nang siya'y nag-mayor, nakita naman ito sa kanyang patuloy na pagsisikap na linisin at baguhin ang pulitika sa kanyang lalawigan.

Palaging ipinagmamalaki sa akin ni Rey ang kanyang nakaraan bilang aktibista at lider ng Bagong Alyansang Makabayan. Ang malapit na pagkakaibigan nila ni Dr. "Bobby" de la Paz na katulad niyang nagsilbi sa mga mahihirap na Samareño sa halip na mangibangbayan. Katulad niya, pinatay din si Dr. de la Paz noong panahon ng diktadurang Marcos. Nakakagalit isipin na ilang dekada matapos mapatalsik si Marcos at maibalik ang demokrasya, nangyari kay Doc. Rey ang nangyari kay Doc. Bobby. Ngayon pa, na ang Presidente ng bansa ay anak ng isa ring biktima ng pagpaslang.

Lumaki ang paghanga ko kay Congressman Rey nang nanindigan siya laban kay Gen. Jovito Palparan nang magkalat ito ng lagim sa Samar at Leyte. Iilan lang silang naglakas loob na suwayin ang tinawag niyang "berdugo ng Samar" sa isang hearing sa Kongreso.

Kahit nang maging partylist congressman na si Palparan, hindi siya tinantanan ni Rey. Nang akusahan siya ni Palparan, sa isang privilege speech, na siya daw ay may mga pinapatay dito sa Samar, nag-privilege speech din si Rey upang pabulaanan ang mga kasinungalingan at isinama pa niya sa Kongreso – buhay na buhay – ang mga sinasabing pinapatay niya. Napahiya at hindi na nagpakita si Palparan at biglang nagbiyahe palabas ng bansa. Ganyan katapang si Rey.

Ipinaglaban niya ang mga biktima ng karahasan. Sino ang mag-aakalang siya mismo ay magiging biktima ng pagpaslang?

Kaya naman napakalaki ang ating panghihinayang sa kanyang pagkamatay. Bihira ang mga opisyal na may tunay na malasakit sa mahihirap at inaapi, na may paninindigan at lakas ng loob na sabihin ang totoo at ipaglaban ang tama, na may malinis na hangarin at likas na pagmamahal at paglilingkod sa bayan. Ang mga katulad nila, ang mga katulad ni Rey, ang gustong patahimikin at patumbahin ng mga masasamang loob at sakim sa kapangyarihan.

Palibhasa, akala nila'y tatahimik at titiklop ang taumbayan kapag pinatay nila si Mayor Uy. Akala nila, mababaon na lang sa limot at takot ang kanilang mga kasamaan. Akala nila, madadala rin sa libingan ang mga prinsipyo at adhikain ni Mayor Uy. Pwes, sori na lang sila. Nagkamali sila ng pinatay.

Sa ginawa nilang ito, lalong titibay ang pagkakaisa ng mga Samareño. Lalong uugong ang boses ng pagbabago. Lalong mayayanig ang kanilang mga kampo at palasyo. Sa pagpatay nila kay Mayor Ining, binuhay nila ang kanyang diwa sa bawat-isa sa atin. Ngayon, hindi na lang si Ining ang kanilang katatakutan kundi ang libu-libong naniniwala sa kanyang sinimulang laban.

Muli, pinakamataas na pagpugay kay Mayor Reynaldo S. Uy!

At sa ating lahat, tuloy ang laban, makibaka, huwag matakot!